Stadig maar seker

Ek het nie op die oomblik die mees stresvolle werk nie, met die gevolg dat ek baie tyd het om die internet te surf en oor allerhande dinge te lees. En ek lees ure lank!!! Oor alles en nog wat!

Toe ons met die hele proses begin het was ek min gespin oor die fisiese versorging van sussie of oor wat ek gaan nodig hê om haar groot te kry. Daar was net twee dinge op my brein; cute klere en haar kamer. Ek het net aanvaar dat manlief, met al sy baie baba ondervinding, sal weet wat om te doen en ek hoef nie te wonder en te stres nie. So ek het nie.

Maar...
Die laaste twee weke of so vang ek myself dat ek voor die baba rakke staan en nie `n clue het wat ek moet koop nie. Dischem is die mees intimiderendste van almal! Het jy al die omvang van die baby wipes rak gesien?
En dit is net die baby wipes! Dan praat ons nie eens van die res van die oneindige lys van opsies nie. En doeke....ek meen daar is so baie opsies en wat is nou eintlik die verskil tussen hulle? Is die basiese doelwit nie om die weewee te vang nie? Vang een doek, regtig, die poepse beter as die ander?

So besluit ek dan dat natuurlike biologiese moeders nie meer die vyand kan wees nie want ek het raad nodig. Ek sal die nare gedagtes opsy moet skuif en vra! (Die oorsprong van die wrewel is mos maar omdat hulle kon en ek kan nie eens met hulp dit regkry nie:) Hoe stupid die vrae ook al mag wees, as ek die regte storie wil hoor sal ek ma die humble pie moet eet!

Natasha is `n mamma van `n 3ling dogters wat ook met die hulp van Dr. Shuda swanger geraak het en sy was daar vir my elke treë van my eie behandeling. So tegnies gesproke was sy nie regtig deel van vyand nie. Anyway daar pak ek die bul by die horings en twee ure later het ons sekere voorkeure. 

Hier volg;

Pampers 

Bennet`s Bum Cream

Johnson`s se Lavender Top to Toe Wash

Actually like ons nou enige Johnson`s wat `n pomperige ding het.

Angel Care Baba monitor - `n nuwe ene!

Tommy Tippee bottels

Oja en ek gaan my babaklere in wit asyn uitspoel en nie met Staysoft nie. Dit was `n nuwe een vir my!

Ek is nog 100% in denial oor setpille. Met tyd kom raad hoop ek!! 

Die verdict is egter nog uit oor `n dummy (ek haat `n dummy) en teething beads. Sussie sal blykbaar self haar voorkeur aandui. Ons gaan ook geen purity koop nie en ek het myself voorgeneem om self pampoen te kook en alles wat goed en voedsaam is vir haar. Ek meen sy beter `n voorliefde vir pampoen ontwikkel voor sy agterkom ek eet Steers crispy chippies i.p.v skorsies!

Hoewel ek nog steeds eerder babakamers, fancy dress kostuums en kinder partytjies Google is ek al baie beter toegerus vir my wagtende titel as moeder. Hoeveel te meer as jou vriendin vir jou `n gedetaileerde medisyne spreadsheet gee met alles wat jy mag nodig kry. Dit is mos nou die moeite werd om deel te word van daardie secret society van moederskap.

So bewandel ek dan nou hierdie nuwe pad, ietwat onbekend en klein bietjie skrikwekkend, wetende dat ek `n helse ondersteuningstelsel het en `n paar vriendinne/mammas wat ek op speed dial kan hou. Ek haal my hoed af vir julle, dames! Dankie dat julle ons nuwe outjies (skaam, vreemd en onkundig) onder die vlerk neem en al julle kennis en ondervinding deel. Julle is awesome verby!!!!